Hvað kennir hin helga Biblía?

Biblían er safn helgra bóka, sem ritaðar voru af fornum spámönnum og sagnriturum. Höfundar þessir skráðu samskipti Guðs við fólk sitt í yfir 4000 ár. Hin innblásnu orð þeirra eru það sem við þekkjum í dag sem Biblíuna.

Ef við lifum eftir þeim kenningum sem Biblían geymir, mun það gera okkur kleift að þekkja Guð, læra af hinu góða fólki sem elskaði hann og skilja betur hvernig hann vill að við högum lífi okkar.

Jesús Kristur er sonur Guðs, sem kom til jarðar til að frelsa okkur frá synd, sorg, sársauka, einmanaleika og fleiru. Jesús kenndi fallegar lexíur um þjónustu og kærleika og gerði mörg kraftaverk þegar hann var á jörðunni. Við getum lesið þær frásagnir í Biblíunni og lært hvernig við getum sigrast á erfiðleikum með liðsinni Jesú.

Í Biblíunni gaf Guð fólki sínu boðorð, eða lögmál, til að lifa eftir. Þau boðorð bjóða okkur að elska Guð og koma fram við aðra af virðingu. Þau bjóða okkur líka að ljúga ekki, stela ekki, myrða ekki og drýgja ekki hór (sjá 2. Mósebók 20). Guð væntir þess enn í dag að við lifum eftir boðorðunum tíu.

Í Nýja testamentinu sýnir Jesús okkur betri leið til að fylgja Guði. Hann kenndi að við þyrftum að halda boðorðin tíu og líka að hafa hreinan huga og hreint hjarta. Kjarni þess að sýna trú á Jesú er að lifa eftir æðstu boðorðunum hans tveimur – að elska Guð og elska náunga okkar eins og okkur sjálf.

Mikilvægast er að Biblían kennir kærleika. Þegar við lesum frásagnir um kærleika í Biblíunni, getum við orðið líkari Jesú. Við getum elskað heitar, þjónað meira og verið fúsari til að fyrirgefa. Við getum lært að elska Guð, náunga okkar og jafnvel óvini okkar.

Meðlimir Kirkju Jesú Krist hinna Síðari daga heilögu trúa líka á aðra helga bók frá Guði, Mormónsbók. Líkt og Biblían, þá kennir hún okkur um Jesú og svarar sumum erfiðustu spurningum lífsins. Sameiginlega veita Biblían og Mormónsbók okkur aukinn skilning á frelsaranum og aukna elsku til hans.